ពត៌មានសុខភាព,
តើសុភាពនារីទាំងឡាយគួរថែទាំខ្លួនបែបណា ក្នុងអំឡុងពេលមករដូវ?
មិត្តនារីទាំងឡាយប្រាកដជាបានជ្រាបច្បាស់ហើយថា អំឡុងពេលមករដូវគឺជាពេលវេលាមួយដ៏តានតឹងបំផុតទាក់ទងនឹងសុខភាព ផ្លូវចិត្ត ក៏ដូចជាសុខភាពផ្លូវកាយរបស់ស្ត្រីទូទៅ ដួចជាការអស់កម្លាំងល្ហិតល្ហៃ ឈឺចាប់ក្នុងពោះ ឆាប់ខឹងឆាប់មួរម៉ៅ រសេះរសោះ គេងពុំលក់ ហើយពេលខ្លះទៀតក៏មានការឈឺចាប់នៅចុងសុដន់។ក្នុងការកាត់បន្ថយភាពឈឺចាប់ ក្នុងអំឡុងពេលមករដូវ ក្រុមការងារយើងនឹងបង្ហាញជូននូវគន្លឹះមួយចំនួនដើម្បីយកទៅអនុវត្ត៖
១. ទទួលទានថ្នាំដើម្បីកាត់បន្ថយភាពឈីចាប់
មុនមករដូវមួយសប្តាហ៌មិត្តនារីទាំងឡាយតែងតែជួបប្រទះ បញ្ហាដូចៗគ្នា គឺការឈឺចុកចាប់ក្នុងពោះដែលបណ្តាលមកពីភ្នាសប្រឹងកន្ត្រាក់ផ្តាច់ ចេញពីស្បូន ហើយអី្វដែលអាចកាត់បន្ថយនូវភាពឈឺចាប់នេះបានគឺមានតែការទទួលទាន ថ្នាំដោយមានការពិគ្រោះយោបល់ជាមួយគ្រូពេទ្យមុននឹងសម្រចចិត្ត ជ្រើសរើសប្រភេទថ្នាំណាមួយយកមកប្រើប្រាស់។
២. អនុវត្តន៌តាមបែបធម្មជាតិងាយៗ
ប្រសិនបើសុភាពនារីមិនចង់ប្រើប្រាស់ឪសថដើម្បីបន្ថយភាពឈឺចាប់ អ្នកកុំព្រួយបារម្ភយើងមានវិធីផ្សេងទៀតដែលអនុវត្តន៌តាមបែប ធម្មជាតិងាយៗ គឺគ្រាន់តែអ្នកយកប្រេងកូឡាលាបឲ្យសព្វកន្លែងឈឺចាប់ ឬយកខ្នើយកំដៅស្អំដាក់នៅចំកន្លែងដែលចុក ហើយវិធីចុងក្រោយគឺការជម្រះកាយជាមួយនឹងទឹកក្តៅឧណ្ឌៗ អាចធ្វើឲរាងកាយទទួលបានភាពធូរស្រាលមួយកម្រិត។
៣. ទាក់ទងការទទួលទានអារហារ
ការទទួលទានអារហារក៏ជារឿងសំខាន់ ជាពិសេសអ្នកគួរទទូលអារហារដែលមានជាតិប៉ូតាស្យូមដែលមាននៅក្នុង ផ្លែឈើដូចជា ផ្លែចេកណាំវ៉ាជាដើម ដែលល្អចំពោះបេះដូង សរសៃប្រសាទ ជំនួយឆ្អឹងនិងតម្រងនោមហើយ ក៏ជំនួយដល់ស្មារតីកុំឲឆាប់រំជួលចិត្ត។ចំពោះអារហារដែលគួរជៀសវាង ក្នុងរយៈពេលនេះ គឺអារហារដែលមានជាតិផ្អែម និងអារហារដែលមានជាតិប្រៃ។
៤. រកពេលវេលាសម្រាកឲ្យបានគ្រប់គ្រាន់
ចូរឆ្លៀតពេលសម្រាកឲ្យបានគ្រប់គ្រាន់ បើទោះបីជាអ្នកមានការមមាញឹកក្នុងការបំពេញកិច្ចការងារប្រចាំថ្ងៃក៏ដោយ ពីព្រោះការសម្រាកបានគ្រប់គ្រាន់អាចរក្សាតុល្យភាពនៅក្នុងរាងកាយ របស់ អ្នក និងក៏អាចជួយឲ្យដំណើរការមករដូវពុំមានភាពរអាក់រអួលផងដែរ។
៥. ពាក់ព័ន្ធចលនារាងកាយ
ការធ្វើលំហាត់ប្រាណក្នុងអំឡុងពេលមករដូវ អាចបណ្តាលឲ្យមានការចុកចាប់នៅក្នុងពោះកាន់តែខ្លាំងជាងមុន ហេតុដូច្នោះអ្នកអាចស្ទង់មើលកម្លាំង ឬស្ថានភាពរបស់ខ្លួនអ្នកផ្ទាល់អាចដំណើរការធ្វើលំហាត់ប្រាណដូច សព្វមួយដង ឬក៏គួរតែផ្អាកនៅក្នុងអំឡុងពេលមករដូវ៕